TIL stendur að blása til sérstaks kynningarátaks um heimilisofbeldi og kynbundið ofbeldi meðal heilbrigðisstarfsfólks, staðla upplýsingar um kynferðisafbrot og festa í sessi verklagsreglur hjá fagfólki um viðbrögð við slíku ofbeldi.

TIL stendur að blása til sérstaks kynningarátaks um heimilisofbeldi og kynbundið ofbeldi meðal heilbrigðisstarfsfólks, staðla upplýsingar um kynferðisafbrot og festa í sessi verklagsreglur hjá fagfólki um viðbrögð við slíku ofbeldi. Þetta kom fram í máli frummælenda á morgunverðarfundi sem aðstandendur sextán daga átaks gegn kynbundnu ofbeldi boðuðu til með forsvarsmönnum stjórnmálaflokkanna. Þá verður unnið að samræmdri áætlun gegn kynbundnu ofbeldi.
Í erindi sínu sagði Þorgerður Katrín Gunnarsdóttir menntamálaráðherra nauðsynlegt að taka til skoðunar þau málefni sem menntamálaráðuneytið gæti unnið í. Í fræðslu barna gæfust einstök tækifæri til að innræta börnum virðingu fyrir líkömum og tilfinningum annarra.

“Við komumst að því að ekkert er rætt sérstaklega um svokallaða kynupplifun, sem er helsti mælikvarði á kynímyndir og kynhegðun hvers og eins fyrr en í síðasta bekk grunnskóla. Ég tel að þessi umræða mætti hefjast mun fyrr í skólakerfinu,” sagði Þorgerður Katrín m.a. Þá sagði hún frá því að réttarfarsnefnd sem ynni m.a. samkvæmt tillögum um samræmda aðgerðaáætlun gegn kynbundnu ofbeldi hefði lagt til að í hegningarlög yrði bætt sérstökum ákvæðum þar sem refsingu mætti þyngja ef tengsl geranda og þolanda væru náin. Nú liggur fyrir frumvarp um breytingar á hegningarlögum í samræmi við tillögur nefndarinnar.

Vilja að gerandi verði tekinn af heimilinu
Í erindum sínum hvöttu fulltrúar stjórnarandstöðunnar til þess að tekin yrði upp svonefnd austurrísk leið varðandi heimilisofbeldi, en hún snýst um það að gerandinn er fjarlægður af heimilinu en ekki þolandinn og sett á hann nálgunarbann á meðan málið er rannsakað. Þetta sögðu fulltrúar stjórnarandstöðu hafa gefist vel, enda út úr kú að refsa þolandanum með því að fjarlægja hann af heimilinu. Lýstu fulltrúar stjórnarandstöðunnar einnig yfir ánægju með þá samstöðu sem hefur ríkt meðal þingmanna um að berjast gegn kynbundnu ofbeldi.
Ingibjörg Sólrún Gísladóttir, formaður Samfylkingarinnar, sagði m.a. í ávarpi sínu að taka þyrfti á markaðsvæðingu sem ríkir varðandi klám og vændi og þeirri klámvæðingu sem ríkir í afþreyingariðnaði hér á landi. Sagði hún umræðuna fasta í klóm markaðshyggjunnar og gjarnan væri talað um vændi og klám sem viðskipti. Þá sagði hún klám og vændi vera brot á mannhelgi, mannöryggi og kynfrelsi, sem væru lykilhugtök og mannréttindi sem bæri að virða. Kynlífsvæðingin væri atlaga að mannhelginni.

mbl.is Mánudaginn 19. desember, 2005 – Innlendar fréttir

Deildu með öðrum ...Share on Facebook
Facebook
0Share on LinkedIn
Linkedin
Tweet about this on Twitter
Twitter
Pin on Pinterest
Pinterest
0Share on Reddit
Reddit
0