Þegar danskir feður segja yfirmönnum sínum frá því að þeir vilji nýta sér rétt sinn til að taka sér feðraorlof, þá eiga þeir á hættu að vera sagt upp störfum. Uppsögnum þungaðra kvenna í Danmörku hefur fækkað nokkuð á umliðnum árum. Fjöldi feðra, sem hyggja á feðraorlof, er hins vegar oftar sagt upp nú en áður.

Það er danska dagblaðið Kristeligt Dagblad, sem greinir frá þessu í dag.

„Það er áhyggjuefni þegar menn, sem ætla að nýta sér rétt sinn, eiga á hættu að missa starf sitt. Við samþykkjum ekki slíkt og munum fara með málið eins langt og komist verður,“ sagði John Dahl, formaður verkalýðsfélagsins HK, í samtali við blaðið.

Fyrir árið 2003 voru uppsagnarmál af þessu tagi fátíð í landinu. Málunum hefur hins vegar fjölgað eftir að karlar fóru í auknum mæli að nýta sér réttinn til að taka sér feðraorlof, að sögn Dahls.

Forsvarsmenn annarra verkalýðsfélaga taka undir orð Dahls en þrjú mál af þessum toga hafa komið inn á borðið hjá verklýðsfélagi í matvælaiðnaði það sem af er þessum mánuði.

Kenneth Reinicke, lektor í kynjafræðum við háskólann í Hróarskeldu, sagði í samtali við blaðið, að þótt málin séu fá þá séu þau grafalvarleg. „Það er mikilvægt að bregðast við í málum sem þessu því nokkur atvik af þessu tagi geta orðið til þess að aðrir feður hætta við orlof sitt,“ sagði hann.

mbl.is 25.08.2005

Deildu með öðrum ...Share on Facebook
Facebook
0Share on LinkedIn
Linkedin
Tweet about this on Twitter
Twitter
Pin on Pinterest
Pinterest
0Share on Reddit
Reddit
0