
Andheiti við foreldrajafnrétti er foreldramisrétti. Ef foreldrajafnrétti stangast á við rétt barns eru þá réttindi barna tryggð frekar með foreldramisrétti?
Félag um foreldrajafnrétti hefur bent á mörg atriði í lögum og framkvæmd laga þar sem móður réttur er í fyrsta sæti, réttur ríkisins í öðru sæti, réttur barnsins í þriðja sæti og réttur föður í fjórða og síðasta sæti. Þar erum við að benda á foreldramisrétti. Það foreldramisrétti sem við bendum á stangast algerlega á við réttindi barns enda koma réttindi barns langt á eftir réttindum móður. Þó svo réttindi barns kæmu á undan réttindum móður, þá er foreldramisrétti alltaf andstætt réttindum barns, enda hefur barn þá ekki sama rétt til beggja foreldra.
Félag um foreldrajafnrétti vill færa réttindi barna úr þriðja sæti upp í það fyrsta. Fram fyrir móður og ríki. Þá viljum við færa réttindi föður upp fyrir réttindi ríkisins og til jafns við réttindi móður. Þannig setur foreldrajafnrétti barnið í fyrsta sætið, foreldra jafna í annað sætið og ríkið í þriðja sætið.
Stefnumál Félags um foreldrajafnrétti eiga sér öll stoð í Samningi Sameinuðu þjóðanna um réttindi barnsins. Réttur barns skal vera án mismununar af nokkru tagi gagnvart barni og/eða aðstæðum foreldra þess. Aðildarríki skulu virða ábyrgð, réttindi og skyldur foreldra og stórfjölskyldu. Barn skal hafa rétt til þess að þekkja foreldra sína og njóta umönnunar þeirra. Barn skal hafa rétt til þess að viðhalda því sem auðkennir það sem einstakling, þar með talið fjölskyldutengslum sínum. Aðildarríki skulu bregðast við og veita börnum vernd ef þau eru svipt fjölskyldutengslum. Aðildarríki skulu tryggja að barn sé ekki skilið frá foreldrum sínum gegn vilja þess. Aðildarríki skulu virða rétt og skyldur foreldra og veita þeim leiðsögn. Aðildarríki skulu tryggja að sú meginregla sé virt að foreldrar fari sameiginlega með forsjá barns og komi því sameiginlega til þroska. Aðildarríki skulu láta foreldrum í té efnislega aðstoð og sjá fyrir stuðningsúrræðum svo foreldrar geti séð fyrir lífsafkomu barnsins.
Ef foreldrajafnrétti stangast á við réttindi barns, þá gerir Barnasáttmáli Sameinuðu þjóðanna það einnig.
Heimir Hilmarsson
varaformaður Félags um foreldrajafnrétti
Leave A Comment
You must be logged in to post a comment.