Fæðingarþunglyndi feðra getur haft langvarandi, slæm áhrif á atferlis- og tilfinningaþroska barnsins, samkvæmt niðurstöðum nýrrar rannsóknar sem læknar við háskólana í Bristol og Oxford gerðu og greint er frá í læknaritinu The Lancet. Í ljós kom að drengir feðra sem þjáðust af þunglyndi í kjölfar fæðingarinnar háttu við tvöfalt meiri hegðunar- og tilfinningavanda að etja en aðrir.

Frá þessu greinir fréttavefur breska ríkisútvarpsins, BBC.

Rannsóknin var gerð í samstarfi við vísindamenn við Háskólann í Rochester í Bandaríkjunum. Kannaðar voru heilsufarsupplýsingar um tæplega 8.500 feður. Í ljós kom, að tveim mánuðum eftir fæðingu virtust 3,6% þeirra þjást af þunglyndi, og voru einkennin m.a. kvíði, skapsveiflur og vonleysi.

Fyrri rannsóknir hafa sýnt að þegar börn þunglyndra feðra komast á táningsár er þeim hættara við geðrænum vandamálum, en þetta er í fyrsta sinn sem sýnt er fram á tengsl þunglyndis feðra og þroska barna í frumbernsku. Ennfremur kom í ljós, að þunglyndi feðra virtist hafa alvarlegri áhrif á drengi en stúlkur.

Paul Ramchandani, geðlæknir við Oxfordháskóla, segir við BBC: „Áhrif feðra á mjög ung börn kunna að hafa verið vanmetin fram að þessu, en þessar niðurstöður benda til að þunglyndi feðra hafi tiltekin og viðvarandi áhrif á atferlis- og tilfinningaþroska barna í frumbernsku.“

Deildu með öðrum ...Share on Facebook
Facebook
0Share on LinkedIn
Linkedin
Tweet about this on Twitter
Twitter
Pin on Pinterest
Pinterest
0Share on Reddit
Reddit
0