Konur eru ánægðar með karlmann í þessu starfi
Ég hef tekið á móti tæplega fjögur hundruð börnum frá því ég byrjaði að starfa sem ljósmóðir fyrir tuttugu árum og vissulega tel ég mig eiga svolítið í hverju og einu þeirra,” segir Denis Walsh frá Bretlandi en hann hélt í síðustu viku nokkur erindi á ráðstefnu á Landspítalanum hjá Ljósmæðrafélagi Íslands.
 
Enginn karlmaður sinnir störfum ljósmóður á Íslandi um þessar mundir en Denis segir að karlar í þessu starfi séu um eitt hundrað í Bretlandi. “Við erum hlutfallslega fáir, því fjöldi ljósmæðra í landinu er um þrjátíu þúsund. En ég er fæddur og uppalinn í Ástralíu og þar er miklu algengara að karlar séu ljósmæður.”

Nær vel til feðra og kærasta
Denis segir að flestar konur hafi ekkert á móti því þótt karl taki á móti börnum þeirra. “En þó er menningarbakgrunnur og trú sumra kvenna þannig að ekki leyfist að karlmaður komi nálægt fæðingunni, eins og til dæmis hjá múslimakonum. Þegar konur koma í fæðingu til mín gef ég mér alltaf góðan tíma til að spjalla við þær, til að byggja upp gott traust. Og eftir fæðinguna lýsa þær oftast yfir ánægju sinni með að hafa haft karlkyns ljósmóður.” Denis segir eiginmenn og kærasta kvennanna sem hann tekur á móti barni hjá oftast mjög sátta við hann í hlutverki ljósmóðurinnar. “Á vissan hátt er það kostur fyrir þá að hafa karlmann í þessu starfi, því ég næ yfirleitt vel til þeirra af þeirri einföldu ástæðu að við erum af sama kyni og samskiptin verða því vandræðalaus.”

Talsmaður ljósmóðurleiddra fæðingardeilda
Denis segir ástæðu þess að hann lærði til ljósmóður þá að hann hafi alla tíð haft gaman af börnum. “Ég lærði fyrst hjúkrun og kunni því sérstaklega vel að annast konur og börn. Þess vegna fór ég í þetta sérnám. Fæðing barns er hamingjuríkur atburður og mér finnst frábært að fá að taka þátt í honum. Starf ljósmæðra er mjög gefandi og sérstakt starf.”
Denis er mikill talsmaður eðlilegra fæðinga (normal birth) þar sem lítið er um inngrip, hvort sem það eru deyfingar, mænustungur eða annað. Hann leggur áherslu á að heimilislegt og afslappað umhverfi í fæðingu stuðli að eðlilegri fæðingu. Erindi hans á ráðstefnunni á Landspítalanum voru einmitt innlegg í komandi breytingar í fæðingarþjónustunni á kvennasviðinu þar, en til stendur að opna Hreiðrið fyrir fleiri konur, en þar verður notaleg ljósmæðraleidd fæðingardeild (Birth Centre).

Denis er með doktorsgráðu í ljósmóðurfræðum, en hann stendur aðeins eina vakt í viku sem ljósmóðir, því hann er öðrum störfum hlaðinn. Hann stundar rannsóknir við Háskóla í Leicester, heldur fyrirlestra víða um heim og hefur auk þess skrifað fjölda greina í blöð og bækur.

www.birthmatters.co.uk  www.ljosmodir.is  

mbl.is 8. júní 2006
Eftir Kristínu Heiðu Kristinsdóttur khk@mbl .

Deildu með öðrum ...Share on Facebook
Facebook
0Share on LinkedIn
Linkedin
Tweet about this on Twitter
Twitter
Pin on Pinterest
Pinterest
0Share on Reddit
Reddit
0