Allt að einn af hverjum 25 feðrum í Bretlandi kann að vera að ala upp barn annars manns án þess að hafa hugmynd um það, segja vísindamenn þar í landi. Er þetta byggt á rannsóknarniðurstöðum sem birtar voru 1950-2004. Genapróf eru nú notuð í auknum mæli til að ganga úr skugga um faðerni barna.

Það voru vísindamenn við John Moores-háskóla í Liverpool sem komust að þessum niðurstöðum, sem birtar eru í nýjasta hefti Journal of Epidemiology and Community Health, að því er fréttavefur BBC greinir frá.

Mark Bellis, sem stjórnaði rannsókninni, segir að þetta „faðernismisræmi“ hafi víðtækar og alvarlegar afleiðingar, en samt hafi því verið lítill gaumur gefinn þótt þess verði sífellt meira vart eftir því sem faðernisprófum fjölgi. Eftirspurn eftir faðernisprófum hefur tífaldast í Bretlandi undanfarinn áratug.

Í rannsókn vísindamannanna í Liverpool kom í ljós, að í gögnum frá 1950-2004 var tíðni þeirra tilvika þar sem í ljós kom að faðir barns var í raun ekki líffræðilegur faðir þess á bilinu eitt til 30%. Sérfræðingar hafa jafnan talið að tíðnin sé almennt undir tíu prósent. En Bellis segir að líklegt megi telja að eftir því sem faðernispróf verði algengari muni tíðnin aukast.

mbl.is 11.08.2005

Deildu með öðrum ...Share on Facebook
Facebook
0Share on LinkedIn
Linkedin
Tweet about this on Twitter
Twitter
Pin on Pinterest
Pinterest
0Share on Reddit
Reddit
0